ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានទម្លាយសារសម្លេងមួយរបស់អ្នកគាំទ្រក្រុមប្រឆាំងនៅក្រៅប្រទេសលោកស្រី មាស លក្ខិណា ដែលបានហៅមនុស្សចំណិតរបស់លោក សម រង្ស៊ី ថាគួរឲ្យខ្ពើមរអើមនិងជាមនុស្សសាហាវឃោឃៅ។

សារសំឡេងដែលបានបង្ហោះនៅលើ Channel Telegram សម្ដេចនៅថ្ងៃទី៤ ខែសីហានេះ លោកស្រី មាស លក្ខិណា បានហៅក្រុមមនុស្សចំណិតរបស់លោកសមរង្ស៊ីថាជាមនុស្សគ្មានច្បាប់ទម្លាប់ប្រើភាសាសាហាវយង់ឃ្នងឃោរឃៅដែលចង់សម្លាប់កូនរបស់អ្នកស្រីដោយអាករ។

ថ្វីត្បិតតែលោកស្រីមិនពេញចិត្តនឹងសម្ដេចតេជោ ហ៊ុន សែន ក៏ប៉ុន្តែលោកស្រីថាសម្ដេចនៅយល់ពីច្បាប់ជាជាងក្រុមមនុស្សរបស់លោក សម រង្ស៊ី នេះ។

លោកស្រីថា៖ «អា ម៉ែន សុថាវរិន្ទ្រ ហ្នឹងវាបង្កើតក្រុមឆ្កែរបស់វាគំរាមយើងសម្លាប់កូនយើងអីសព្វបែបយ៉ាង។ សាហាវណាស់អាពួកនេះវាឃោរឃៅសាហាវយង់ឃ្នងណាស់!»។

ជាមួយគ្នានេះសម្ដេចតេជោបានសរសេរថានេះជាការលើកឡើងដោយក្រុមអ្នកគាំទ្រក្រុមប្រឆាំងនៅក្រៅប្រទេស។

សម្ដេចថា៖ «សូមស្ដាប់សំដីលោកស្រីមាស់ លក្ខិណា ដែលនិយាយអំពីភាពសាហាវរបស់ក្រុមប្រឆាំងនៅក្រៅប្រទេសនិងការលំបាកនៃជីវភាពសម្រាប់អ្នករស់នៅប្រទេសក្រៅ។ ទោះបីលោកស្រីស្អប់និងជេរប្រមាថខ្ញុំតែលោកស្រីនៅតែចាត់ទុកក្រុមលោកស្រីជាអ្នកសាហាវ។ សូមកុំសួរថាសម្លេងនេះបានមកដោយរបៀបណា?និងសូមស្តាប់ទាំងអស់គ្នា»៕